​सेलु व घोराडमध्ये ईद-उल-फित्र उत्साहात साजरी सर्वधर्मियांकडून स्वागत करत जोपासला सामाजिक सलोखा!

​सेलु/अभय बेदमोहता

ईद-उल-फित्र निमित्त सेलु शहर तसेच नजीकच्या प्रतीपंढरी घोराड येथे उत्साहाचे व आनंदाचे वातावरण पाहायला मिळाले. विविध समाजांच्या सहभागातून या सणादरम्यान सामाजिक एकोपा आणि बंधुभावाचे अनोखे दर्शन घडले.
​सकाळी घोराड येथे मुस्लिम बांधवांकडून एका भव्य मिरवणुकीचे आयोजन करण्यात आले होते. ही मिरवणूक श्री संत केजाजी महाराज मंदिराजवळ पोहोचल्यानंतर, बशीरभाई शेख व त्यांच्या परिवाराच्या वतीने मिरवणुकीत सहभागी बांधवांना दूध, चहा व केळीचे वाटप करून त्यांचे स्वागत करण्यात आले.
​सेलु शहरात विविध घटकांकडून
​घोराडहून निघालेली मिरवणूक सेलुमधील विकास चौकात पोहोचली. येथे कलीम शेख यांच्या वतीने पोहे, मटकी उसळ (मोट) व शरबतचे वाटप करण्यात आले. तसेच ‘नवचैतन्य बौद्ध कमिटी’ सेलुच्या वतीने गोड जलेबीचे वितरण करत आनंद व्यक्त करण्यात आला. विविध समाजबांधवांनी मिरवणुकीचे उत्स्फूर्त स्वागत करत शहरात सामाजिक सलोख्याचा गोड संदेश दिला.
​यानंतर सेलु बाजार रोड येथील जामा मशिदीवरून मुख्य मिरवणुकीला सुरुवात झाली. शहरातील प्रमुख मार्गांवरून काढण्यात आलेल्या या मिरवणुकीचे ठिकठिकाणी नागरिकांनी स्वागत केले. या वेळी सहभागी नागरिकांना शरबत, नाश्ता, केळी व हलवा यांचे वितरण करण्यात आले.
​ईदच्या निमित्ताने संपूर्ण शहरभर आनंदाचे वातावरण होते. मेडिकल चौकात साहसिक जनशक्ती संघटनेचे अध्यक्ष व दै.साहसिक चे संपादक रवींद्र कोटंबकार, राजेश वरटकर, पिंटू पांडे आणि पवन रहांगडाले यांनी मुस्लिम बांधवांना प्रत्यक्ष भेटून ईदच्या हार्दिक शुभेच्छा दिल्यात.
​सणात कोणतीही अनागोंदी होऊ नये म्हणून सेलू पोलीस स्टेशनचे उपनिरीक्षक उगले यांच्या नेतृत्वाखाली राकेश देवगडे, जावेदभाई धामिया, सुनील चावरे आणि गृहरक्षकांनी चोख बंदोबस्त ठेवला होता. यामुळे शहरात शांतता व सुव्यवस्था अबाधित राखण्यास मोठी मदत झाली.
‌​या उत्साही वातावरणाचा समारोप करण्यासाठी आज रात्री माहेर मंगल कार्यालयात एका विशेष जंगी‌इफ्तार पार्टीचे आयोजन करण्यात आले असून, याद्वारे सणाचा आनंद द्विगुणित करण्यात येणार आहे.