ए बी के न्यूज लाईव्ह
प्रतिनिधी देवेंद्रकुमार रंगुवार 
अंकिसा – सिरोंचा तालुक्यातील आसरआली वनपरिक्षेत्रात एकाच आठवड्यात दुसरी मोठी धडक कामगिरी; पातागुडम पाठोपाठ कोपेला भागात छापा मारून असरल्ली वनपरिक्षेत्राने केले दोन लाख 17 हजाराचे सागवान जप्त, सर्व तस्करांचे धाबे दणाणले!विशेष बातमी दिनांक 19 सप्टेंबर 2026: पोळा सण व गणेशोत्सवाच्या काळात लाकडाची मागणी वाढण्याची तसेच वन्यजीवांची शिकार होण्याची शक्यता लक्षात घेता, सिरोंचा वनविभागाने लाकूड तस्करांविरुद्ध सुरू केलेली धडक मोहीम अत्यंत आक्रमक केली आहे. सिरोंचा वनविभागाचे उपवनसंरक्षक नवकिशोर रेड्डी यांनी सर्व परिक्षेत्र अधिकारी, वनपाल व वनरक्षकांना सतर्क राहून २४ तास विशेष गस्त वाढविण्याचे कडक आदेश दिले आहेत. या आदेशांनुसार वनविभागाने आपली गस्त आणि शोधमोहीम तीव्र केली आहे.पातागुडम पाठोपाठ आता कोपेला भागात धडक कारवाई: गेल्या 14 सप्टेंबर रोजी पातागुडम भागातील इंद्रावती नदी किनारी २ सागवान लठ्ठे पकडून वनविभागाने तस्करांचा पहिला डाव उधळला होता. यानंतर वनविभागाने आपली शोधमोहीम अधिक तीव्र केली. 14 सप्टेंबरच्या कारवाईनंतर अवघ्या एकाच आठवड्यात आता थेट कोपेला भागात ही दुसरी मोठी कारवाई झाल्याने संपूर्ण परिसरातील सर्व सागवान तस्करांचे धाबे पार दणाणले आहेत.गुप्त माहिती आणि तत्पर कारवाई: वनविभागाने उभारलेल्या भक्कम बातमीदारांच्या आणि गुप्तहेरांच्या जाळ्यामुळे तस्करांच्या हालचालींची गुप्त माहिती मिळताच, असरल्लीचे वनपरिक्षेत्र अधिकारी शिवाजी पानगे यांनी तातडीने क्षेत्र सहाय्यक गेडाम यांना याची कल्पना दिली. माहिती मिळताच क्षेत्र सहाय्यक गेडाम आणि त्यांच्या टीमने जराही वेळ न गमावता अत्यंत शिस्तबद्ध नियोजन करत थेट घनदाट जंगलात छापा टाकला आणि ही यशस्वी कारवाई पार पाडली.घनदाट जंगलात छापा: सदर कारवाई उपक्षेत्र कोपेला अंतर्गत नियतक्षेत्र कोपेला-१ (कक्ष क्रमांक २९८) येथील जंगलात करण्यात आली. या छाप्यात वन पथकाने १० नग सागवानी लाकडे (१.८३ घनमीटर) जप्त केली आहेत. जप्त करण्यात आलेल्या या मौल्यवान सागवान लाकडांची अंदाजे किंमत ₹२,१७,००० (दोन लाख सतरा हजार रुपये) आहे.मागील एक महिन्यापासून असरल्ली वनपरिक्षेत्राने विविध ठिकाणी कारवाई करत जवळपास 9 घनमीटर सागवान लाकूड जप्त केले असून त्याचे बाजार मूल्य जवळपास दहा लाखाच्या आसपास आहे.कडक ऊन, डासांचा प्रादुर्भाव आणि घनदाट जंगल; तरीही कर्मचाऱ्यांची अतुलनीय कर्तव्यनिष्ठा: . वाढलेले प्रखर तापमान, जंगलातील डासांचा प्रचंड प्रादुर्भाव (मच्छर) आणि समोर उभे असणारे घनदाट जंगल अशा अत्यंत खडतर परिस्थितीला तोंड देत क्षेत्र सहाय्यक गेडाम व त्यांच्या टीमने जंगलाच्या कानाकोपऱ्यात गस्त घालून ही धडक कारवाई केली.कुटुंब रुग्णालयात असतानाही अधिकारी पानगे यांचे खंबीर नेतृत्व: असरल्लीचे वनपरिक्षेत्र अधिकारी शिवाजी पानगे यांच्या पत्नी आणि मुलाला डेंग्यू ची लागण झाली असून त्यांच्यावर तेलंगणातील मंचिरियाल (Mancherial) येथील रुग्णालयात उपचार सुरू आहेत. असे गंभीर कौटुंबिक आणि वैद्यकीय संकट समोर असतानाही, अधिकारी शिवाजी पानगे यांनी आपल्या कर्तव्यात यत्किंचितही कसर सोडू दिली नाही. रुग्णालयात उपस्थित असतानाही त्यांनी तिथूनच गुप्त माहिती मिळवून दूरध्वनीद्वारे क्षेत्र सहाय्यक गेडाम व टीमला मार्गदर्शन केले आणि संपूर्ण मोहिमेचे यशस्वी नेतृत्व केले.भारतीय वन अधिनियम १९२७ अंतर्गत गुन्हा दाखल; तस्करांचा शोध तीव्र: सदर कारवाई सिरोंचा वनविभागाचे उपवनसंरक्षक एस. नवकिशोर रेड्डी व उपविभागीय वनाधिकारी अक्षय मीना यांच्या प्रत्यक्ष मार्गदर्शनाखाली, असरल्लीचे वनपरिक्षेत्र अधिकारी शिवाजी पानगे यांच्या नेतृत्वाखाली, क्षेत्र सहाय्यक गेडाम आणि असरल्ली वनपरिक्षेत्र वन कर्मचाऱ्यांच्या पथकाने यशस्वीरीत्या पार पाडली.या प्रकरणात आरोपीविरुद्ध भारतीय वन अधिनियम १९२७ (Indian Forest Act, 1927) अंतर्गत गुन्हा दाखल करण्यात येणार असून फरार आरोपींचा शोध घेण्याची मोहीम वनविभागाने अत्यंत तीव्र केली आहे. “सण-उत्सवाच्या काळात वन गुन्ह्यांना पूर्णपणे आळा घालण्यासाठी गस्त अधिक कडक करण्यात आली आहे. अवैध तोड किंवा तस्करी करणाऱ्या कोणत्याही गुन्हेगाराची गय केली जाणार नाही,” असा कडक इशारा वनविभागाने दिला आहे. एकापाठोपाठ एक झालेल्या या धडक कारवायांमुळे सागवान तस्करांचे धाबे पार दणाणले आहेत.